മാതാ അമൃതാനന്ദമയി ദേവിയുടെ അറുപതാം പിറന്നാളാഘോഷത്തിന്റെ ഭാഗമായി അമൃതപുരിയില്‍ രാവിലെ നടന്ന ഘോഷയാത്ര. വിവിധ രാജ്യങ്ങളില്‍ നിന്നെത്തിയ അമ്മയുടെ ഭക്തര്‍ തങ്ങളുടെ രാജ്യത്തിന്റെ ദേശീയപതാകകളുമേന്തി ആശ്രമത്തില്‍ നിന്ന്, ആഘോഷപരിപാടികളുടെ പ്രധാനവേദിയായ അമൃത ഇന്‍സ്റ്റിറ്റിയൂട്ട് കാമ്പസിലേക്കാണ് ഘോഷയാത്ര നടത്തിയത്. തുടര്‍ന്ന് ഈ പതാകകള്‍ പ്രധാനവേദിക്കു സമീപം ഉയര്‍ത്തി.
അമൃതപുരി (കൊല്ലം): കഴിഞ്ഞ കാല്‍നൂറ്റാണ്ടായി അമ്മ എന്നു ചെന്നൈയിലെത്തിയാലും ഭക്തസഹസ്രങ്ങള്‍ക്കൊപ്പം നീണ്ട നിരയില്‍ കാത്തുനിന്ന് അമ്മയുടെ ദര്‍ശനം വാങ്ങുന്ന ഒരു കലാകാരനുണ്ട് – കാരൈക്കുടി മണി. ഒരിക്കലും കലാകാരനെന്ന പേരില്‍ സ്വാധീനം ചെലുത്തി അമ്മയെ കാണാന്‍ ശ്രമിക്കാതിരുന്ന ആ മൃദംഗവിദ്വാന്‍ അമൃതപുരയില്‍ അമ്മയുടെ അറുപതാം പിറന്നാളാഘോഷവേദിയില്‍ ഒരു മണിക്കൂര്‍ കൊട്ടിത്തിമിര്‍ത്തു, കഴിഞ്ഞദിവസം.
എട്ടാം വയസ്സില്‍ മൃദംഗത്തില്‍ അരങ്ങേറ്റം കുറിച്ച മണിയുടെ കലാജീവിതത്തിന്‍റെ അറുപതാണ്ടുകള്‍ തികയുന്ന വര്‍ഷം കൂടിയാണിത്. അമ്മയുടെ അറുപതാം പിറന്നാളുമായി അത് ഒത്തുവന്നതും ആ സമയത്ത് ലക്ഷക്കണക്കിനുവരുന്ന അമ്മയുടെ ഭക്തര്‍ക്കു മുന്നില്‍ തന്‍റെ കലാവിരുന്ന് ഒരുക്കാനായതും വലിയൊരു ഭാഗ്യമായി മണി കരുതുന്നു. ആദ്യമായാണ് മണി അമ്മയുടെ സന്നിധിയില്‍ പരിപാടി അവതരിപ്പിക്കുന്നത്.
ഒരു മണിക്കൂര്‍ നീണ്ട, ‘ഷണ്‍മുഖ’ എന്നു പേരിട്ട കലാവിരുന്നില്‍ മണിയുടെ മൃദംഗവും പുല്ലാങ്കുഴല്‍, മാന്‍ഡലിന്‍, ഇലക്ട്രിക് വയലിന്‍, ഘടം, തബല എന്നിങ്ങനെ ആറു വാദ്യങ്ങളുമാണ് സംഗീതവിസ്മയം തീര്‍ത്തത്.
മണിയും സംഘവും അവതരിപ്പിച്ച താളവിസ്മയത്തിനു മുമ്പ് പണ്ഡിറ്റ് ഹരിപ്രസാദ് ചൗരസ്യയുടെ പുല്ലാങ്കുഴല്‍ കച്ചേരിയാണ് അമൃതപുരിയെ നാദലഹരിയില്‍ ആറാടിച്ചത്.
അമ്മയുടെ അന്‍പതാം പിറന്നാള്‍ ആഘോഷങ്ങളില്‍ പങ്കെടുത്ത് കൊച്ചിയില്‍ പുല്ലാങ്കുഴല്‍ കച്ചേരി അവതരിപ്പിച്ച ചൗരസ്യ പത്തുവര്‍ഷത്തിനുശേഷം വീണ്ടും രണ്ടുമണിക്കൂര്‍ നീളുന്ന സംഗീതസമര്‍പ്പണവുമായി അമ്മയുടെ സന്നിധിയില്‍ എത്തുകയായിരുന്നു. വിശ്വാസികളുടെ സമുദ്രത്തിനു മുന്നില്‍ കലാവിരുന്നൊരുക്കാന്‍ സാധിക്കുന്നതിലും വലിയ മറ്റൊരുകാര്യമില്ലെന്നും ഇതൊരു കച്ചേരിയായിരുന്നില്ല, തനിക്കൊരു അനുഗ്രഹമായിരുന്നെന്ന് പണ്ഡിറ്റ് ചൗരസ്യ പറയുന്നു.
അമ്മയുടെ അടുത്ത പിറന്നാളാഘോഷങ്ങളിലും പങ്കെടുക്കാന്‍ താന്‍ അതിയായി ആഗ്രഹിക്കുന്നുണ്ടെന്ന് അദ്ദേഹം പറഞ്ഞു. കാണികള്‍ക്കു മുന്നില്‍ കച്ചേരി അവതരിപ്പിക്കുമ്പോള്‍ താന്‍ അമ്മയ്‌ക്കൊപ്പമാണെന്ന് പണ്ഡിറ്റ് ചൗരസ്യ ചൂണ്ടിക്കാട്ടുന്നു.
24/9/2013 അമൃതപുരി (കൊല്ലം): അന്താരാഷ്ട്രപ്രശസ്തയായ ആദ്ധ്യാത്മിക മാര്‍ഗദര്‍ശകയും, മനുഷ്യസ്‌നേഹിയുമായ ശ്രീ മാതാ അമൃതാനന്ദമയി ദേവി (അമ്മ) യുടെ ഭക്തന്മാര്‍ നടത്തുന്ന വനവത്കരണ കര്‍മ്മപരിപാടി കേരള മുഖ്യമന്ത്രി ശ്രീ. ഉമ്മന്‍ ചാണ്ടി ഇന്ന് ഉത്ഘാടനം ചെയ്തു. ഈ വനവത്കരണ കര്‍മ്മപരിപാടിയിലൂടെ 60 ലക്ഷം വൃക്ഷത്തൈകള്‍ സെപ്റ്റംബര്‍ 2013 നും സെപ്റ്റംബര്‍ 2014 നും ഇടയില്‍ നടും.
കേരള തലസ്ഥാനമായ തിരുവനന്തപുരത്ത് മുഖ്യമന്ത്രിയുടെ ഔദ്യോഗികവസതിയായ ക്ലിഫ് ഹൗസില്‍ വൃക്ഷത്തൈ നട്ടുകൊണ്ട് മുഖ്യമന്ത്രി കര്‍മ്മപരിപാടി ആരംഭിച്ചു. കര്‍മ്മപരിപാടിയുടെ ഭാഗമായി കേരളത്തില്‍ 60 ലക്ഷം വൃക്ഷത്തൈകള്‍ നടും.
വൃക്ഷത്തൈകളുടെ വിതരണവും നടീലും ഭക്ത-സന്നദ്ധസേവകരുടെയും അതുപോലെ വിദ്യാഭ്യാസ സ്ഥാപനങ്ങള്‍, അമൃതവിശ്വവിദ്യാപീഠം സര്‍വകലാശാലയുടെ 5 ക്യാമ്പസുകള്‍, 50 ല്‍ അധികം അമൃതവിദ്യാലയം സ്‌കൂളുകളുടെയും പിന്തുണ സ്വീകരിച്ചുകൊണ്ട് സംഘടിപ്പിക്കും. ഇന്ത്യക്ക് പുറത്ത്, ‘എംബ്രേസിംഗ് ദ് വേള്‍ഡ്’ വൃക്ഷത്തൈ വിതരണത്തിനും നടീലിനും സൗകര്യമൊരുക്കും.
ഐക്യരാഷ്ട്രസഭയുടെ ശതകോടി വൃക്ഷ പ്രചാരണപ്രവര്‍ത്തനത്തിലെ അംഗമെന്ന നിലയില്‍ മാതാ അമൃതാനന്ദമയി മഠം 2001 മുതല്‍ ഇതിനോടകം 10 ലക്ഷത്തില്‍ കൂടുതല്‍ വൃക്ഷങ്ങള്‍ നടുവാന്‍ സഹായിച്ചിട്ടുണ്ട്.